Kəlbəcərdə BAL KİMİ festival-Vətənin şirinliyinə qayıdış
30 illik həsrətdən sonra Vətənin şirinliyinə qayıdış…
Bəzən bir torpağın qoxusu insanın illərlə danışa bilmədiyi duyğuları dilə gətirir. Bəzən
bir bulağın səsi, bir çiçəyin ətri, dağların görünüşü insanın yaddaşında uzun illər
gizlənmiş Vətən hissini yenidən oyadır.
Kəlbəcər şəhərində keçirilən “Bal kimi festival” da məhz belə duyğuların yaşandığı
tədbirlərdən biri oldu. 30 illik həsrətdən sonra doğma torpaqlarda belə bir festivalın
keçirilməsi yalnız bir tədbir deyil, həm də Vətənlə insanın yenidən görüşünün rəmzi idi.
Sanki Kəlbəcərin təbiəti illər sonra öz insanlarına “Xoş gəlmisiniz!” deyirdi.
Sanki arı təbiətlə əvvəlcədən sözləşmişdi: “Sənin çiçəklərinin gözəl iyini, dağlarının
havasını, yurdunun şirinliyini bal adlı möcüzədə insanlarına hiss etdirəcəyəm.”
Balın içində təbiətin ahəngi
Bu festivalda bal sadəcə bir nemət deyildi. Bal burada təbiətin, zəhmətin, Vətənin və
insanın görüş nöqtəsinə çevrilmişdi. Arı çiçəkdən-çiçəyə qonur, təbiətin rəngini və ətrini özündə toplayır, sonra onu balın şirinliyinə çevirir. Bəlkə də elə buna görə balın dadında
yalnız şirinlik deyil, təbiətin özü hiss olunur.
Kəlbəcərin balında isə başqa bir şirinlik də var — Vətənin şirinliyi.
Kəlbəcər şəhəri — təbiət və sərvət məkanı
Kəlbəcər şəhəri və onun ətrafı təbii gözəllikləri, dağları, meşələri, yaylaqları, bulaqları və zəngin təbiəti ilə Azərbaycanın qiymətli bölgələrindəndir. Bu təbii mühit arıçılıq, kənd təsərrüfatı, ekoturizm və digər sahələrin inkişafı üçün böyük imkanlar yaradır.
Ona görə də Kəlbəcər şəhərində bu cür festivalların keçirilməsi yalnız mənəvi baxımdan
deyil, iqtisadi və turizm baxımından da çox əhəmiyyətlidir. Belə tədbirlər yerli
məhsulların tanıdılmasına, arıçılığın inkişafına, istehsalçıların öz məhsullarını təqdim etməsinə və Kəlbəcərə turist marağının artmasına töhfə verə bilər.
Festivalın ən böyük şirinliyi — Vətəndir
30 il həsrətdən sonra insan öz torpağında dayananda adi görünən bir çiçək belə başqa
cür görünür. Bir bulağın suyu başqa cür dadır. Dağın havası başqa cür hiss olunur.
İnsan anlayır ki, Vətən yalnız xəritədə göstərilən ərazi deyil.
Vətən — insanın yaddaşıdır. Vətən — doğma torpağın qoxusudur. Vətən — uşaqlıq
xatirələridir. Vətən — dağın, bulağın, çiçəyin və insanın bir-birinə bağlılığıdır. Və bəzən ütün bunları bir qaşıq balın içində hiss etmək mümkündür.
Kəlbəcər şəhərində keçirilən bu festival mənə görə həm də “Vətən, insanına xoş
gəlmisiniz!” deyən bir qarşılanma idi.
Daha çox belə tədbirlər keçirilməlidir
Arzum budur ki, Kəlbəcər şəhərində belə tədbirlər tez-tez keçirilsin. Bal festivalı ilə
yanaşı, bölgənin təbiətini, mədəniyyətini, musiqisini, folklorunu, sənətkarlığını və yerli
məhsullarını tanıdan müxtəlif festivallar təşkil edilsin.
Çünki Vətənə qayıdış yalnız evlərin, yolların və binaların yenidən qurulması deyil.
Vətənə qayıdış həm də həmin torpağın ruhunu yenidən yaşatmaqdır.
Kəlbəcər şəhərində “Bal kimi festival” bu baxımdan həm iqtisadi, həm turizm, həm də
mənəvi əhəmiyyət daşıyan gözəl bir nümunədir.
Arzu edək ki, Kəlbəcərin çiçəkləri daha çox açılsın, arıları daha çox vızıldasın, balı daha
çox süzülsün və bu torpaqda Vətən şirinliyini yaşadan festivalların sayı ildən-ilə artsın.
Çünki 30 illik həsrətdən sonra Kəlbəcərin balı bizə yalnız bir dadı xatırlatmadı — o, bizə
Vətənin dadını xatırlatdı.
Kəlbəcər, Vətəninə xoş gəlmisən!
Bal kimi festivalın qutlu olsun!
Müəllif: Namiq Tofiqoğlu