Rəqəmsal dövrdə mətbuat  və kommunikasiya vasitələrinin rolu

XXI əsrdə informasiya və kommunikasiya texnologiyaları cəmiyyətin inkişafına təsir göstərən əsas amillərdən biridir və dünyada önəmli dəyişikliklərə səbəb olmuşdur. Müasir dünyada informasiya axınının sürətlə artması, texnologiyaların inkişafı və qloballaşma prosesi kommunikasiya və mətbuatın cəmiyyət həyatındakı rolunu daha da gücləndirmişdir. İnformasiya həm fərdi həyatın, həm də ictimai münasibətlərin əsasını təşkil edir. Məhz bu baxımdan, mətbuat və kommunikasiya anlayışları yalnız xəbər ötürülməsi ilə məhdudlaşmır, eyni zamanda ictimai rəyin formalaşması, siyasi iştirakın təşviqi, maarifləndirmə və mədəni dəyərlərin ötürülməsi funksiyalarını da daşıyır. Mətbuat demokratik mədəniyyətimizin ən önəmli parçalarından birisidir. Demokratiyanın təməl daşlarından olan mətbuatın xalqın zamanında məlumatlandırılması nöqteyi-nəzərindən əhəmiyyətli vəzifələri vardır. Mətbuat demokratik mədəniyyətin ayrılmaz bir parçasıdır. Millətimizin , dövlətimizin , xalqımızın təhlükəsizliyinə, hüzuruna qəsd etmək istəyən bəzi mərkəzlərin terror faaliyətlərinə , xəyanət şəbəkələrinə, kökü xaricdə olan cərəyanlara qarşı mətbuatımız önəmli rola sahibdir.  Əməkləri və alın tərləriylə ölkəmizin rifah səviyyəsinin yüksəlməsində, qarşıya qoyulan strateji hədəflərə çatmasında və dövlətimizin parlaq bir gələcəyə yürüşundə  mətbuat çalışanları əhəmiyyətli rola sahibdirlər.

Kommunikasiya, sadəcə məlumat mübadiləsi prosesi deyil, insanın özünü ifadə etməsi, qarşılıqlı anlaşma qurması və sosial əlaqələr yaratması üçün əsas vasitədir. Bu proses həm şifahi, həm də yazılı, həm də vizual formalarla həyata keçirilə bilər və bütün sosial institutlar üçün vacib əhəmiyyət kəsb edir. Mətbuat isə kommunikasiya sisteminin ən təsirli vasitələrindən biri kimi, məlumatın ictimaiyyətə çatdırılmasında mühüm rol oynayır. Xüsusilə demokratik cəmiyyətlərdə mətbuat “dördüncü hakimiyyət” kimi təsvir edilir və vətəndaşların informasiya alma hüququnun təminatçısı kimi çıxış edir.

Rəqəmsal texnologiyaların inkişafı nəticəsində ənənəvi mətbuat formaları ilə yanaşı, sosial media, bloqlar, veb-saytlar və mobil tətbiqlər kimi yeni kommunikasiya kanalları meydana çıxmışdır. Bu dəyişikliklər təkcə informasiya ötürülməsi metodlarını deyil, həm də cəmiyyətin informasiya qəbul etmə tərzini dəyişmişdir. Belə bir şəraitdə kommunikasiya savadlılığının artırılması, media mənbələrinin etibarlılığının dəyərləndirilməsi və etik jurnalistikanın təşviqi vacib məsələlərə çevrilmişdir.

Azərbaycan cəmiyyətində də mətbuat və kommunikasiya sahələri ciddi transformasiyalara məruz qalmışdır. Dövlətin bu sahədə həyata keçirdiyi islahatlar, qanunvericilik təşəbbüsləri, rəqəmsal infrastrukturun genişlənməsi və gənc nəslin media ilə fəal münasibəti bu sahənin strateji əhəmiyyətini bir daha ortaya qoyur. Lakin eyni zamanda mətbuat azadlığı, informasiya təhlükəsizliyi, etik problemlər də bu sahədə mövcuddur.

                    Mətbuat və kommunikasiya anlayışı

Kommunikasiya termini latınca communicare sözündən götürülmüşdür və “paylaşmaq”, “ortaq etmək”, “məlumat vermək” mənalarını ifadə edir. Bu anlayış təkcə informasiya ötürülməsi prosesi deyil, həm də qarşılıqlı anlaşmanın, mənanın paylaşılmasının, sosial münasibətlərin qurulmasının əsası kimi çıxış edir. Mətbuat isə kommunikasiya vasitələrinin cəmiyyətlə əlaqə yaratmasında əsas rol oynayan institutdur və yazılı, elektron və rəqəmsal formatlarda fəaliyyət göstərir. Kommunikasiya fərdi və kollektiv səviyyədə cəmiyyətin formalaşmasında və idarə olunmasında aparıcı funksiyalardan birini yerinə yetirir. Bu prosesi yalnız texniki vasitələr vasitəsilə həyata keçirilən məlumat mübadiləsi kimi deyil, həm də sosial-mədəni kontekst çərçivəsində mənaların istehsalı və yayılması kimi dəyərləndirmək lazımdır. Beləliklə, mətbuat və kommunikasiya bir-biri ilə sıx bağlı olan, lakin fərqli funksiyaları yerinə yetirən iki əsas sosial fenomendir.

Kommunikasiyanın nəzəri əsasları XX əsrin əvvəllərindən inkişaf etməyə başlamış və müxtəlif yanaşmalar əsasında sistemləşdirilmişdir. Aşağıda müasir kommunikasiya elminin əsas nəzəri modellərinə qısa nəzər salaq:

• Şennon və Uiver modeli— informasiya nəzəriyyəsinə əsaslanan bu model, kommunikasiya prosesini texniki aspektdən izah edir: informasiya mənbəyi, ötürücü, kanal, qəbuledici və səs-küy faktorları. Bu model əsasən texniki kommunikasiya sistemləri üçün nəzərdə tutulsa da, insan kommunikasiya proseslərinin təhlilində də ilkin baza rolunu oynamışdır.
• Berlo modeli— Berlonun SMCR (Source-Message-Channel-Receiver) modeli kommunikasiya prosesində psixoloji və mədəni komponentlərin də rolunu vurğulayır. Mənbə, mesaj, kanal və qəbul edən şəxsin biliyi və psixoloji vəziyyəti mesajın mənasına təsir göstərir.
• Lasswell modeli— “Kim danışır? Nə deyir? Hansı kanalla? Kimə? Nə təsir göstərir?” sualları əsasında qurulmuş bu model, kütləvi informasiya vasitələrinin siyasi və sosial analizlərində geniş istifadə olunur. Bu gün də siyasi kommunikasiya təhlillərində aktualdır .

Müasir dövrdə bu modellər yenidən interpretasiya edilərək, interaktiv kommunikasiya, çoxkanallı informasiya axını, fərdiləşdirilmiş mesajlar və algoritm əsaslı informasiya yayımı kimi yeni anlayışlarla tamamlanır.

Mətbuat ictimai həyatın ayrılmaz hissəsidir və bir sıra mühüm funksiyalar yerinə yetirir:

• Məlumatlandırma funksiyası: Ənənəvi və yeni mətbuat vasitələri ictimaiyyətə aktual məlumatları təqdim edir, vətəndaşların informasiya alma hüququnu təmin edir. Bu funksiya xüsusilə fövqəladə hallarda və ictimai təhlükəsizlik məsələlərində kritik əhəmiyyət daşıyır.
• Maarifləndirmə funksiyası: Mətbuat və kommunikasiya cəmiyyətdə maarifçilik prosesini təşviq edir. Xüsusilə səhiyyə, hüquq, ətraf mühit və təhsil sahələrində bu funksiya çox vacibdir. Məsələn, Ümumdünya Səhiyyə Təşkilatının COVID-19 pandemiyası dövründə yaydığı maarifləndirici məlumatların yerli KİV vasitəsilə geniş auditoriyaya çatdırılması əhalinin davranışına təsir etmişdi.
• İctimai rəyin formalaşdırılması: Mətbuat və kommunikasiya vasitələri siyasi, iqtisadi və sosial məsələlər ətrafında ictimai rəyin yönləndirilməsində mühüm rol oynayır. 2024-cü ildə Azərbaycanda keçirilən COP29 İqlim Konfransına hazırlıq mərhələsində media resurslarının dövlət siyasətinin dəstəklənməsi istiqamətində həyata keçirdiyi fəaliyyət buna nümunədir.
• Tənqid və nəzarət funksiyası: Mətbuat hakimiyyət orqanlarının fəaliyyətini izləyir, ictimai maraqları qoruyur və şəffaflığın təminatçısı kimi çıxış edir. Azərbaycanda bu sahədə həm müstəqil media, həm də sosial media istifadəçiləri ictimai nəzarətin həyata keçirilməsində mühüm rol oynayır.
• Əyləndirmə funksiyası: Bu funksiya da cəmiyyət üçün vacibdir. Xüsusilə yeni media platformaları — YouTube, TikTok və Instagram kimi şəbəkələr — əyləncə ilə yanaşı, informasiya və maarifləndirməni birləşdirən kontent formaları ilə kommunikasiya məkanını dəyişməkdədir.

Qeyd etmək lazımdır ki, kommunikasiya və mətbuat anlayışları zamanla dəyişir. Əvvəllər tək istiqamətli olan kommunikasiya — yəni yalnız bir mənbədən auditoriyaya yönələn informasiya ötürülməsi — bu gün interaktiv və çoxkanallı xarakter daşıyır. İstifadəçi yalnız informasiya qəbul edən deyil, eyni zamanda istehsal edən və paylaşan subyektə çevrilmişdir. Bu baxımdan, “prosumer” (producer + consumer) termini bu sahədə geniş istifadə olunur. Məsələn, Azərbaycanın sosial media məkanında “Instabloger” və “vlogger” kimi fəaliyyət göstərən şəxslər həm kontent istehsal edir, həm də izləyici auditoriyası ilə birbaşa əlaqə qururlar. Beləliklə, klassik jurnalistika ilə vətəndaş jurnalistikası arasında sərhədlər bulanıqlaşır.

       Rəqəmsal dövr, kommunikasiya sahəsində köklü dəyişikliklərə səbəb olmuşdur. Ənənəvi media dedikdə qəzet, jurnal, televiziya və radio kimi bir tərəfli informasiya ötürən kanallar nəzərdə tutulursa, yeni media daha çox interaktivlik, sürət və əlçatanlıqla xarakterizə olunur. Yeni medianın əsas üstünlüyü onun zaman və məkan məhdudiyyətlərini aradan qaldırması, istifadəçinin həm istehlakçı (consumer), həm də istehsalçı (producer) kimi çıxış etməsinə imkan yaratmasıdır.

Bu xüsusiyyət yeni kommunikasiya anlayışını formalaşdırmışdır: prosumer kommunikasiya. Məsələn, TikTok, Instagram və X (əvvəlki Twitter) kimi platformalar vasitəsilə istənilən şəxs informasiya yarada, paylaşa və ictimai rəyə təsir göstərə bilər. 2024-cü ilin Digital Global Overview Report-una əsasən, dünya üzrə 5.04 milyard insan internet istifadəçisidir və onların 4.76 milyardı sosial media aktiv istifadəçiləridir. Bu göstəricilər mediada rəqəmsallaşmanın nə qədər geniş yayıldığını təsdiq edir.

Sosial media platformaları yalnız fərdi münasibətlərin deyil, həm də ictimai diskursun əsas məkanına çevrilmişdir. Ənənəvi mətbuat orqanlarının nəzarət etdiyi informasiya axını indi fərdi istifadəçilər, blogerlər, “vlogger”lər və hətta süni intellekt alqoritmləri tərəfindən formalaşdırılır. Bu dəyişiklik media strukturunda desentralizasiya ilə nəticələnmişdir.

Yeni medianın verdiyi sərbəstlik informasiya təhlükəsizliyi və etibarlılığı sahəsində problemlər yaradır. “Fake news” (saxta xəbər) termini artıq qlobal miqyasda informasiya ekosisteminin əsas təhlükəsi kimi qiymətləndirilir. Dezinformasiyanın məqsədyönlü şəkildə yayılması, siyasi və ictimai rəyə təsir etmək üçün istifadə olunması həm beynəlxalq, həm də lokal səviyyədə ciddi çağırışlar doğurur.

Məsələn, 2023-cü ilin sonlarında Ermənistanla sərhəddə baş verən insidentlə bağlı sosial mediada yayılan təsdiqlənməmiş məlumatlar bir neçə saat ərzində minlərlə istifadəçi tərəfindən paylaşılmış və müxtəlif manipulyativ şərhlərlə müşayiət olunmuşdur. Azərbaycan Respublikasının Rəqəmsal İnkişaf və Nəqliyyat Nazirliyi, Medianın İnkişafı Agentliyi və digər qurumlar bu kimi hallarda ictimaiyyəti yalnız rəsmi mənbələrə istinad etməyə çağırmışdır. Bu kontekstdə media savadlılığının artırılması, süni intellekt əsaslı “fact-checking” (fakt yoxlama) alətlərinin tətbiqi və ictimai təhsilin genişləndirilməsi zərurətə çevrilmişdir.

Bütün bu dəyişikliklər qarşısında cəmiyyətin uyğunlaşması üçün media savadlılığı (media literacy) əsas komponentlərdən biri hesab olunur. Media savadlılığı, fərdin informasiya mənbələrini dəyərləndirmə, mesajları təhlil etmə, dezinformasiyaya qarşı müqavimət göstərmə bacarığıdır. UNESCObu sahəni XXI əsr vətəndaşlarının əsas kompetensiyalarından biri kimi qiymətləndirir. Azərbaycanda bu istiqamətdə bəzi təşəbbüslər həyata keçirilmişdir. 2023-cü ildə Medianın İnkişafı Agentliyinin dəstəyi ilə bir neçə universitetdə “Media savadlılığı” təlimləri təşkil olunmuş, orta məktəblərdə isə pilot proqramlar sınaqdan keçirilmişdir.

Azərbaycanda mətbuat və kommunikasiya siyasəti

Azərbaycanda mətbuatın tarixi 1875-ci ildə Həsən bəy Zərdabinin nəşr etdirdiyi “Əkinçi” qəzeti ilə başlayır. Lakin müasir media sisteminin formalaşması əsasən 1991-ci ildə dövlət müstəqilliyinin bərpasından sonra sürətlənmişdir. Sovet dövründə mətbuat əsasən ideoloji məqsədlərə xidmət etdiyi halda, müstəqillikdən sonra hüquqi və institusional islahatlarla mətbuatın azadlığı üçün hüquqi zəmin yaradılmışdır.

1998-ci ildə Ulu Öndər Heydər Əliyevin fərmanı ilə mətbuata senzura rəsmi şəkildə ləğv edilmiş, bu isə regionda ilk belə addımlardan biri olmuşdur. Bu qərar Azərbaycanın insan hüquqları və ifadə azadlığı sahəsində beynəlxalq öhdəliklərinə uyğun atılmış mühüm addım idi. Lakin zamanla media sahəsində tənzimləmə zərurəti yaranmış və qanunvericilik mütəmadi olaraq yenilənmişdir.

Azərbaycanda mətbuat və informasiya sahəsini tənzimləyən əsas normativ sənədlərə aşağıdakılar daxildir:

• Azərbaycan Respublikasının Konstitusiyası – 50-ci maddə: “Kütləvi informasiya vasitələri azaddır. Senzuraya yol verilmir.”
• “Kütləvi informasiya vasitələri haqqında” Qanun (1999)
• “İnformasiya əldə etmək haqqında” Qanun (2005)
• “Media haqqında” Qanun (2021) – Bu qanunla yeni vahid sistem yaradılmış, Medianın İnkişafı Agentliyi və Media Reyestri təsis olunmuşdur.

2021-ci ildə qəbul edilən “Media haqqında” yeni qanun geniş müzakirələrə səbəb olmuşdur. Tənqidçilər bu qanunun media azadlığına risk yarada biləcəyini bildirsə də, hökumət bunu media sektorunda peşəkarlaşdırma və şəffaflıq üçün atılmış islahat addımı kimi təqdim etmişdir. Qanunla jurnalistlərin qeydiyyatı, informasiya əldə etmək hüquqları, məsuliyyət mexanizmləri daha dəqiq tənzimlənmişdir .

Azərbaycanda jurnalist fəaliyyətinin etik çərçivəsi əsasən aşağıdakı prinsiplərə əsaslanır: obyektivlik, balanslılıq, informasiya mənbələrinin qorunması, təhqirdən və yalan informasiyadan çəkinmək. Azərbaycan Jurnalistlər Birliyi və Yeni Nəsil Jurnalistlər Birliyi bu prinsipləri təşviq edən əsas qurumlardandır.

2022-ci ildə Media Agentliyi və ADA Universiteti ilə birgə həyata keçirilən “Etika, müəllif hüquqları və jurnalistika” təlimləri bu istiqamətdə mühüm addım olmuşdur. Təlimin məqsədi jurnalistlərin etik prinsiplərə riayət etməsi, müəllif hüquqları ilə bağlı biliklərinin artırılması və peşəkar jurnalistikanın inkişafına töhfə vermək idi. Tədbirdə “The Washington Times”, “New York Times” və digər nüfuzlu beynəlxalq media orqanlarında çalışmış jurnalist və ekspert Tülin Daloğlu spiker kimi çıxış etmiş, jurnalistlərlə interaktiv müzakirələr aparmışdır. Təlimə 40-a yaxın media nümayəndəsi qatılmış və sonda iştirakçılara sertifikat təqdim olunmuşdur .

Bununla belə, bəzi hallarda etik qaydaların pozulması, xüsusən şəxsi həyatın gizliliyinə müdaxilə və təsdiqlənməmiş məlumatların yayılması ilə bağlı problemlər mövcuddur. Bu isə ictimai etimadın azalmasına və informasiya mühitində qarışıqlığa səbəb ola bilir.

Rəqəmsal dövrdə dövlətlər informasiya təhlükəsizliyini milli təhlükəsizlik strategiyalarının ayrılmaz hissəsi kimi qəbul edirlər. Azərbaycanda da bu sahədə son illərdə ciddi addımlar atılmışdır. Xüsusilə  “Rəqəmsal İnkişaf Konsepsiyası” çərçivəsində informasiya təhlükəsizliyinin artırılması prioritet sahə kimi müəyyən olunmuşdur[1]. Bundan əlavə, Medianın İnkişafı Agentliyi, Rəqəmsal İnkişaf və Nəqliyyat Nazirliyi, Elektron Hökumətin İnkişafı Mərkəzi və Azərbaycan İnternet Forumu informasiya təhlükəsizliyi, rəqəmsal savadlılıq, rəsmi kommunikasiya strategiyaları kimi sahələrdə koordinasiyalı fəaliyyət göstərir.

Dövlət qurumlarının sosial mediada aktivliyi də bu strategiyanın bir hissəsidir. Məsələn, Prezident Administrasiyası, XİN və Təhsil Nazirliyi kimi strukturların “X” (Twitter), Telegram və Instagram hesablarında vətəndaşla interaktiv münasibət yaratması dövlət kommunikasiyasında yeni mərhələ sayılır.

Azərbaycanın media və kommunikasiya sahəsində qarşısında duran başlıca çağırışlar bunlardır:

• Media mühitinin peşəkarlaşdırılması – jurnalistlərin təlimi, hüquqi və etik biliklərinin artırılması
• Sosial mediada dezinformasiyaya qarşı tədbirlər – “fact-checking” mərkəzlərinin gücləndirilməsi
• Gənclərin media savadlılığının artırılması – məktəb və universitet proqramlarına inteqrasiya
• Yeni texnologiyaların tətbiqi – süni intellekt, data jurnalistika, media arxitekturasının inkişafı

BMT-nin 2024-cü il hesabatında qeyd olunur ki, informasiya təhlükəsizliyi və medianın etibarlılığı milli rifahın əsas indikatorlarından biri hesab olunacaq. Buna görə də Azərbaycanın kommunikasiya sahəsində institusional və hüquqi islahatlarını davam etdirməsi, həm dövlət, həm də vətəndaş cəmiyyətinin bu prosesdə birgə iştirak etməsi olduqca əhəmiyyətlidir.

Mətbuat və kommunikasiya müasir cəmiyyətlərin sosial, siyasi, iqtisadi və mədəni strukturlarında dərin iz buraxan əsas institutlar sırasındadır. Tədqiqat əsasında müəyyən olundu ki, kommunikasiya prosesi təkcə informasiya ötürülməsi deyil, eyni zamanda sosial münasibətlərin formalaşdırılması, ictimai dəyərlərin paylaşılması və kollektiv şüurun inkişafında aparıcı rol oynayır. Mətbuat isə bu prosesin əsas daşıyıcısı kimi çıxış edərək, vətəndaşların informasiya alma hüququnun təminində, ictimai rəyin formalaşmasında və demokratik nəzarətin gücləndirilməsində əvəzolunmaz vasitə hesab olunur.

XXI əsrin ikinci və xüsusilə üçüncü onilliyi ilə birlikdə rəqəmsal texnologiyaların sürətli inkişafı media və kommunikasiya anlayışlarını köklü şəkildə dəyişdirmişdir. Ənənəvi media ilə yanaşı sosial şəbəkələr, veb platformalar, bloglar və süni intellekt əsaslı kommunikasiya alətləri yeni informasiya mühiti formalaşdırmışdır. Bu şəraitdə prosumer mədəniyyəti genişlənmiş, informasiya istehsalında və yayımında fərdi iştirak artmışdır. Lakin bu dinamizm, eyni zamanda, “fake news”, manipulyativ kontent və informasiya təhlükəsizliyi kimi yeni problemləri də gündəmə gətirmişdir.

Azərbaycan kontekstində mətbuat və kommunikasiya siyasəti bir tərəfdən qanunvericilik islahatları, rəqəmsal infrastrukturun inkişafı və dövlət qurumlarının kommunikasiya fəaliyyətlərinin müasirləşdirilməsi ilə xarakterizə olunsa da, digər tərəfdən media azadlığı, peşəkar jurnalistikanın gücləndirilməsi və ictimai etimadın artırılması kimi çağırışlarla da üzləşir. Medianın İnkişafı Agentliyi, Rəqəmsal İnkişaf və Nəqliyyat Nazirliyi kimi strukturlar bu sahədə institusional əsasları genişləndirməyə çalışır, lakin cəmiyyətin adaptasiya səviyyəsi və media savadlılığı hələ də qeyri-bərabər səviyyədədir.

İnformasiya cəmiyyətinin inkişafında effektiv kommunikasiya strategiyalarının hazırlanması, etibarlı medianın təşviqi, etik jurnalistikanın dəstəklənməsi və gənc nəslin media savadlılığının artırılması əsas strateji prioritetlərdən biri olmalıdır. Eyni zamanda, informasiya təhlükəsizliyi sahəsində texnoloji yeniliklərdən istifadə, “fact-checking” mərkəzlərinin təşviqi və ictimai iştirakçılığın gücləndirilməsi uzunmüddətli perspektivdə Azərbaycanın media sisteminin davamlı inkişafını təmin edə bilər. Media demokratiyanın əsas halqalarından biridir və jurnalistlər düzgün məlumatı qərəzsiz şərhlə birbaşa vətəndaşlara çatdırmağa cavabdeh olan peşəkarlardır. Mətbuatın xalqı bilgiləndirmənin yanında başqa vəzifəsinin də birlik və bərabərliyini gorunması kimi vəzifələri vardır.  Azərbaycann tanıtımında da çok böyuk rolu vardır. Özəlliklə son zamanlarda internet qəzetəçiliyində əhəmiyyətli dəyişikliklər olmuşdur. Azərbaycan Konstitusiyasında söz və mətbuat azadlığının təməl prinsip olaraq əksini tapması ölkədə medianın azad və güclü bir cəmiyyət institutu kimi formalaşmasına təkan vermişdir. Azərbaycan xalqının ümummilli lideri Heydər Əliyevin 1998-ci il 16 avqust tarixli “Azərbaycan Respublikasında söz, düşüncə və informasiya azadlığının təmin edilməsi tədbirləri haqqında” Fərmanı ilə ölkədə kütləvi informasiya vasitələri üzərində senzura ləğv edilib. Bu fərmanda kütləvi informasiya vasitələrinin sürətli inkişafına ciddi təkan verməklə yanaşı, onların rasionallığının artırılması sahəsində geniş Dövlət Proqramının əsas istiqamətlərini müəyyən edilmişdir. Azərbaycan Respublikasının Prezidenti cənab İlham Əliyev 12 yanvar 2021-ci il tarixdə Azərbaycan Respublikasında media sahəsində islahatların dərinləşdirilməsi haqqında Fərman imzalamışdır.. Bu Fərmana əsasən, Azərbaycanda medianın inkişafının dəstəklənməsi, bu sahədə institusional quruculuq işlərinin davam etdirilməsi, yeni informasiya-kommunikasiya texnologiyalarının və innovasiyaların tətbiqinin stimullaşdırılması məqsədilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılmışdır. Mətbuatımız inkişf etmişdir və irəliləmişdır. Mətbuat çalışanlarımız vəzifələrini icra edərkən texnolojik imkanlarla məsləklərini modern üsullarala həyata keçirməktədir. Mətbuatın inkişafında ən böyük pay, vəzifələrini fədəkarca icra edən mətbuat işçiləridir. Bundan sonra da mətbuat işçiləri tarixi vəzifələrinin haqqlarını verəcəklər və səmimiyyətlə, dürüstlüklə, həyəcanla çalışacaqlar, Azərbaycan güclü bir dövlətdir.

Murtəza Həsənoğlu

Azərbaycan Respublikasının Prezidenti yanında Dövlət İdarəçilik Akademiyasının   dekanı, siyasi elmlər üzrə fəlsəfə doktoru, dosent