Komitə sədri də təhsildən yazdı:”Əxlaq dəyərləri ilə zənginləşdirilmiş təhsil…”

Ümummilli Lider Heydər Əliyev: “Təhsil hər bir dövlətin, ölkənin, cəmiyyətin həyatının, fəaliyyətinin mühüm bir sahəsidir. Cəmiyyət təhsilsiz inkişaf edə bilməz. Təhsilsiz xalq müasir şəraitdə öz imkanlarını həyatına sərf etmək üçün çox problemlərlə rastlaşar. Həyat böyük bir prosesdir. Bu prosesdə uğurla iştirak etmək üçün insan müasir tələblərə uyğun olan təhsilə malik olmalıdır. Təhsil də daim təkmilləşdirilməlidir. Müasir texnikanı, müasir bazar iqtisadiyyatının bütün yollarını mənimsəmək, respublikada tətbiq etmək üçün gələcək nəsli hazırlamaq və keçmiş dövrə nisbətən bir çox yeni ixtisaslar üzrə kadrlar hazırlamaq lazımdır. Şübhəsiz ki, bütün bunlar ali təhsil səviyyəsində olacaqdır. Ancaq bunların əsası orta təhsil illərində qoyulmalıdır. Yəni, gənclərin bu istiqamətdə təhsilin artırılmasının təməli qoyulmalıdır. Bunu iqtisadiyyatımızın bu günü və gələcəyi tələb edir”.

Əlbətdə ki, dahi rəhbər Heydər Əliyevin qeyd etdiyi kimi təhsil, təlim-tərbiyə hər bir dövlətin strateji əhəmiyyətli fəaliyyət sahəsi olmaqla həmin dövlətin siyasi-iqtisadi, sosial və mədəni inkişafını müəyyən etməklə cəmiyyətin mənəvi dəyərlərini formalaşdırır. Təsadüfi deyil ki, inkişaf yolunu seçmiş hər bir dövlət ilk növbədə təhsilin inkişafına xüsusi diqqət yetirir, çünki təhsil gənclərə həyat şəraitini yaxşılaşdırmaq və əmək bazarında yer tutmaq üçün daha parlaq perspektivlər verməklə yanaşı əhalinin maariflənməsi və yoxsulluğun azaldılmasında da əsas rol oynayır. Eyni zamanda qeyd etməliyik ki, təhsil cəmiyyətin tərəqqisinin hərəkətverici qüvvəsi olaraq vətəndaşı cəmiyyətdə ən məhsuldar təfəkkürlü qüvvəyə çevirir, fərdin və ya kollektivin ümumi inkişafını təmin edir, milli-mənəvi dəyərləri qoruyur, intellektual potensialı formalaşdırır, hüquqi cəmiyyətin qurulmasında əvəzsiz rol oynayır.

Bu mənada müasir təhsilimizin qarşısında duran əsas çağırışlardan biri də biliklərin artırılması ilə yanaşı, milli-mənəvi, əxlaqi dəyərləri aşılamaq olmalıdır. Çünki bu dəyərlərlə zənginləşdirilmiş təhsil təkcə yaxşı mütəxəssislər deyil, eyni zamanda mənəvi cəhətdən sağlam, sosial məsuliyyət daşıyan, ideoloji cəhətdən möhkəm fərdlər yetişdirmək gücündədir. Əxlaq dəyərləri ilə zənginləşdirilmiş təhsil, həm bu gün, həm də gələcək nəsillərin daha ədalətli, dürüst və sosial cəhətdən məsuliyyətli olmasına səbəb olamaqla qlobal səviyyədə daha harmonik, sülhsevər və davamlı bir cəmiyyətin qurulmasına şərait yaradacaqdır.

Bu gün dünyada baş verən hadisələr, sürətli qloballaşma, dünya əhalisinin artımı, urbanizasiya, iqlim dəyişikliyi, təbii fəlakətlər, ölkələr arasındakı münaqişələr və s. kimi məsələlər bizdən təhsilin daha keyfiyyətli və dayanıqlı əsaslarla qurulmasını tələb edir. Təsadüfi deyil ki, Azərbaycanın birinci xanımı çıxışlarında qeyd edir: “Müasir dünyada hər bir ölkənin inkişafı, onun dünya birliyinə inteqrasiyası üçün təhsilin rolu əvəzsizdir”.

Təhsil insan kapitalının inkişafı ilə bağlıdır. İnkişaf etmiş ölkələrdə insan kapitalı milli sərvətin 70-80 %-ni təşkil edir. Bu da həmin ölkələrdə gənclərin, eləcə də əhalinin hamısının  həyat boyu təhsillənməsinin inkişafını ön plana çəkir. Azərbaycan Respublikasının Prezidenti İlham Əliyev qeyd edir ki: “Hər bir ölkənin bu günü və gələcəyi təhsillə bilavasitə bağlıdır. Təhsilin səviyyəsi, eyni zamanda, elmi-texniki tərəqqini də böyük dərəcədə şərtləndirir. İnkişaf etmiş ölkələrin təcrübəsinə baxdıqda, görürük ki, onları inkişaf etmiş ölkələrə çevirən təbii resurslar yox, məhz bilik, savad, təhsil və elmin inkişafıdır”.

Təbii ki, bu hədəflərə çatmaq üçün ilk növbədə təhsil işçiləri, xüsusilə də bu sahəni idarəedənlərin öz bilikləri, bacarıqları və davranışları ilə cəmiyyətin ehtiyac və tələblərinə gözlənilən səviyyədə cavab verilməlidir. Çünki sistemləşdirilmiş bilik, bacarıq və vərdişləri daim təmin etmək, milli-mənəvi və ümumbəşəri dəyərləri qoruyan və inkişaf etdirən, geniş dünyagörüşünə malik olan, təşəbbüsləri və yenilikləri qiymətləndirməyi bacaran, nəzəri və praktiki biliklərə yiyələnən, müasir təfəkkürlü və rəqabət qabiliyyətli mütəxəssis-kadrlar hazırlamaq, eyni zamanda Azərbaycan dövləti qarşısında öz məsuliyyətini dərk edərək vətənpərvərlik və azərbaycançılıq ideyalarına sadiq olan vətəndaş və şəxsiyyət yetişdirmək ilk növbədə onların vəzifəsidir.

Amma xüsusi olaraq qeyd etməliyik ki, bügünkü təhsilimizin qarşısındakı problemlər ümummilli məsələdir, təhsilin modernləşdirilməsi və inkişafı istiqamətlərinin müəyyənlənləşdirilməsi təhsil ictimaiyyəti və təhsil işçiləri ilə məhdudlaşdırıla bilməz, cəmiyyətimizin bütün vətəndaşları, dövlət hakimiyyət orqanları, peşə – pedaqoji ictimaiyyət, elmi, mədəni və ictimai institutlar bütövlükdə təhsil siyasətinin fəal subyektlərinə çevrilməlidir.