“…Azərbaycan artıq gündəmi dəyişir və diqtə edir”-Tarixçi alim
“Şuşa bizim üçün mənəvi, ideoloji baxımdan müqəddəs bir yerdir. 44 günlük müharibədə qazandığımız qələbədə Şuşanın azad olunması, digər torpaqlarımızın azadlığı bizə çox böyük ruh yüksəkliyi, mənəvi güc verdi. Bu birmənalıdır. Bunu hər bir azərbaycanlı- istər ölkə daxilində, istərsə də xaricdə yaşayan azərbaycanlılar – hər kəs fəxr hissi ilə qeyd edir. Qurultayın da belə bir məkanda -Şuşada keçirilməsi Azərbaycan diasporaları üçün həm mənəvi, siyasi, həm də ideoloji baxımdan önəmlidir”.
Kanal32.az xəbər verir ki, bunu AMEA-nın aparıcı elmi işçisi Sübhan Talıblı Şuşa Zəfərindən dünyaya verilən mesajlar və diasporalarımızın qarşısında duran vəzifələrlə bağlı açıqlamasında deyib.
S.Talıblı hesab edir ki, hər bir azərbaycanlı yaşadığı ölkədən, çalışdığı sahədən, sosial mövqeyindən asılı olmayaraq Azərbaycanın kimliyi uğrunda çalışmalıdır.
“Hər bir azərbaycanlı vətəninin təbliğatçısı olmalıdır. Əgər biz təşkilatlanmadan danışırıqsa, burda ortaq variantlar tapılmalıdır. İstər cənublu olsun, istər şimallı, istər qərb, istərsə də şərq bölgəsindən olan azərbaycanlılar- hər birimiz xaricdə vətənimizin müdafiəsi baxımından ortaq birləşdirici vasitələri tapmalıdır. Bütün qüvvələri bir Azərbaycan ocağına gətirməyi bacarmalıyıq. Onların güclərindən yararlanmalıyıq. Diasporların olduqları yerlərdə, saytları, nəşrləri olmalıdır. Azərbaycanın təbliğatı üçün kitabxanaları, televiziyaları olmalıdır ki, öz səslərini yaya bilsinlər”.
S.Talıbli bildirib ki, Avropa ölkələrində ermənipərəstlik çoxdur. Zamanla Türkiyə və Azərbaycana qarşı ermənilərdən siyasi alət kimi istifadə edilib və edilir. Onun sözlərinə görə, bu gün regionda vəziyyət dəyişib.
“İndi nə Türkiyə həmin Türkiyə deyil, nə də Azərbaycan həmin Azərbaycan deyil. Həm maddi sərvətlərimiz, həm diplomatik müstəvidə Avropa dövlətlərinə çıxmaq imkanlarımız yüksələn xəttə üzrə gedir. Ölkə prezidentinin dünyanın ən nüfuzlu kanallarına verdiyi müsahibələrində suallara çox cəsarətlə, açıq cavab verdiyini görürük. Bu günlər isə biz Şuşa Zəfərində də eyni cəsarətli mesajların şahidi olduq. Görünən odur ki, Azərbaycan artıq gündəmi dəyişir və diqtə edir. Ermənistan bir daha sülhə çağırılır və tövsiyə edilir ki, düzgün addımlar atsın. Əks halda bir daha ona Dəmir Yumruğun yerində olduğu xatırladılır.
Coğrafi və tarixi vəziyyət də fərqlidir. Bu gün maraqlı güclərin Türkiyəyə, Azərbaycana qarşı təzyiq vasitəsi varsa, Azərbaycanla Türkiyənin də onlara qarşı regionda təzyiq vasitələri var. Bu gün Azərbayacan ordusu zamanla Rusiyanın qoşun növlərində xidmət eləmirdisə, bizim peşkar zabitlərimiz az idisə, bu gün peşəkar hərbi hissələrimiz, müasir silahlarımız var. Bu gün Azərbaycan ordusu beynəlxalq hərbi təlimlərinə qatılır. Biz Zəngəzur dəhlizi deyiriksə, demək regionda sülh istəyirik. Bu da qarşı tərəfə bir mesajdır. Əgər o yol yoxdursa, biz alternativ yolla o istiqamətə gedəcəyik. Azərbaycan dövləti, Prezidenti tərəfindən burda açıq və net olaraq siyasət ortaya qoyulub. Ölkə rəhbəri də deyir ki, geci tezi var, bir Zəngəzura gedəcəyik. Hələ ki, biz diplomatik, siyasi, qarşılıqlı anlaşma, beynəlxalq hüquqa söykənərək məsələləri bütün regiona, dövlətlərlə birgə qoyuruq”. (hafta.az)