Kəlbəcər rayonunun görkəmli ziyalılarından biri, çoxlu sayda dövlət təltiflərinin laureatıı Vəliyəddin İsmayılovun yubileyidir. İndiyədək bir çox yüksək vəzifələrdə çalışmış Vəliyəddin müəllimin 80 yaşı tamam olur.
Kanal32.az yubilyar təbrik edir, onun keçdiyi həyat yolunun ən önəmli məqamlarını oxucuların diqqətinə çatdırır:
Vəliyəddin Misir oğlu İsmayılov 1943-cü ildə Azərbaycan Respublikası Kəlbəcər rayonunun Moz-Qaraçanlı kəndində anadan olub. 1960-cı ildə Kəlbəcər rayonunun Ağcakənd kənd tam orta ümumtəhsil məktəbini bitirib. 1960-1962-ci illərdə kolxozçu olmuş, 1967-ci ildə S.Ağamalıoğlu adına Azərbaycan Kənd Təsərrüfatı İnstitutunu, 1971-ci ildə Zaqafqaziya Komsomol Məktəbini, 1976-cı ildə Bakı Ali Partiya Məktəbini bitirib.
1967-1968-ci illərdə rayonun “Bakı” və “Qələbə” kolxozlarında mütəxəssis, 1968-1969-cu illərdə Kəlbəcər Rayon Komsomol Komitəsində Təşkilat Şöbəsinin müdiri, 1969-1973-cü illərdə Rayon Komsomol Komitəsinin birinci katibi vəzifələrində işləyib.
Sonradan Vəliyəddin İsmayılova etimad göstərilərək partiya işinə keçirilib, Rayon Partiya Komitəsində 1973-1974-cü illərdə təlimatçı vəzifəsində işləyib, 1974-1976-cı illərdə Bakı Ali Partiya Məktəbində dinləyici olib. 1976-1980-ci illərdə Kəlbəcər Rayon Partiya Komitəsində Təşkilat Şöbəsinin müdiri, 1980-1983-cü illərdə Kəlbəcər Rayon Xalq Nəzarəti Komitəsinin sədri, 1983-1989-cu illərdə Rayon İcraiyyə Komitəsinin sədr müavini, Kəlbəcər Rayon Aqrar-Sənaye Birliyi Şurasının sədri, 1989-1996-cı illərdə Azərbaycan Respublikası Dövlət Aqrar Sənaye Komitəsində, Azərbaycan Respublikası Kənd Təsərrüfatı Nazirliyində, Ət-Süd Sənaye Nazirliyində, “Azəryeyintisənaye” Dövlət Şirkətində baş mütəxəssis, şöbə rəisi, Mərkəz direktoru vəzifələrində çalışıb.
1996-cı ildən “Azərsu” Səhmdar Cəmiyyətində rəis müavini, şöbə rəisi vəzifələrində çalışmış, ömrünün iyirmi ilə yaxınını “Abşeron Regional Səhmdar Su Cəmiyyəti”nin və “Azərsu” Səhmdar Cəmiyyətinin inkişafına, “Böyük Bakı”nın, ümumiyyətlə respublika əhalisinin içməli su ilə təchizatına böyük əmək sərf etmiş, dəyərli töhfələrini verib. Bu sahədə dünya təcrübəsinin öyrənilməsi üçün Böyük Britaniyanın London, Birmingem şəhərlərində, Türkiyənin İstanbul şəhərində olub.
Kəlbəcər rayonunda rəhbər vəzifələrdə işləyən dövrlərdə rayonun mədəni-quruculuq sahəsində, sosial-iqtisadi inkişafında yorulmadan çalışıb, kəndlərin abadlaşdırılmasında, əhalinin işlə təmin edilməsi, rifah halının yaxşılaşdırılması üçün bütün qüvvələrini sərf edib, vəzifəsi və səlahiyyəti çərçivəsində bütün tədbirləri görüb.
Rayonun kənd təsərrüfatına rəhbərlik etdiyi dövrdə rayon əhalisinin işlə təmin edilməsində, kolxoz-sovxozların maddi bazasının möhkəmləndirilməsində, bütün kəndlərin abadlaşdırılması, sosial obyektlərin tikilməsi, kəndarası yolların, yaylaq yollarının çəkilməsi, bəzi yaylaq və binələrin elektrik enerjisi ilə təmin edilməsində şəxsi fəaliyyət göstərib. O dövr üçün bunlar çox böyük nailiyyət idi.
Tutquçay–Abdullauşağı, Abdullauşağı–Moz, Moz–Qoçdaş avtomobil yollarını, Moz-Qaraçanlı-Mehdixanlı yaylaq yolunu çəkdirib. Qoçdaş-Ağyataq su xəttinin (7 km. məsafə) çəkilişini başladıb, heyf ki, Ermənistanın hərbi təcavüzü nəticisində yarımçıq qalıb.
Vəliyəddin İsmayılov rayon ərazisində yeni tipli xəstəxana, inzibati-idarə binası, orta məktəb binası, heyvandarlıq kompleksinin tikilməsinə təşəbbüskar olub və rəhbərlik edib. 1987-ci ildə Kəlbəcər–Laçın (Bəylik–Lolabağır) Kəlbəcər–Toğana (Murov yolu) yolunun çəkilişi üçün sərf olunan vəsaiti Aqrar-Sənaye Birliyində əldə olunan gəlir hesabına təmin edib. Bu gəlirin əldə edilməsi, abadlıq, quruculuq işlərinin əsaslı inkişafı, tarixdə izi qalan bu yolların çəkilişi o dövrdə rayona rəhbərlik edən şəxslərin və Kəlbəcər əhalisinin çox böyük tarixi qələbəsidir. Çünki bu yollar vasitəsilə Laçın, Kəlbəcər və Göyçə camaatının çox hissəsi erməni təcavüzü zamanı ölüm və işgəncələrdən xilas olublar. Bu həqiqətdir, heç kəs bu tarixi həqiqəti silə bilməz.
Vəliyəddin İsmayılov respublikanın və Kəlbəcər rayonunun ictimai-siyasi həyatında fəal iştirak edib. 1969-1975-ci illərdə Respublika Komsomol Mərkəzi Komitəsinin üzvü, 1978-1989-cu illərdə Kəlbəcər Rayon Partiya Komitəsinin büro üzvü, 1969-1989-cu illərdə Rayon Sovetinin deputatı olub.
“Əmək igidliyi”, “Əməkdə fərqlənmə” və V.İ.Leninin 100 illik “Yubiley medalı” ilə təltif olunub, “Əmək veteranı”, “Ümumittifaq Komsomolu Mərkəzi Komitəsinin “Fəal Komsomol işinə görə”, SSRİ İttifaqının “Şərəfli əməyə görə”, “Əməkdə fərqlənmə” döş nişanları ilə təltif edilib və bir neçə fəxri fərmanlar alıb.
Vəliyəddin İsmayılov 1998-ci il prezident seçkilərində Azərbaycan respublikasının prezidentliyə namizəd Ulu öndər Heydər Əliyevin Mərkəzi Seçki Qərərgahının üzvü, Qarabağın və digər işğal olunmuş – Kəlbəcər, Laçın, Şuşa, Ağdam, Xocalı, Qubadlı, Cəbrayıl, Zəngilan, Xocavənd, Ağdərə rayonlarının seçicilərinin təşəbbüs qrupunun rəhbəri olub. Azərbaycan Respublikası Mərkəzi Seçki Komissiyasının səlahiyyətli nümayəndəsinin və İlk Təşəbbüs Qrupunun qeydə alınması haqqında 1 №-li şəhadətnaməsi məhz ona verilib. 1998-ci il prezident seçkilərində Ulu öndər Heydər Əliyevin prezidentliyə namizədliyini ilk olaraq təşəbbüs qrupunun adından o irəli sürmüş və Respublika Prezidentliyinə namizəd Heydər Əliyevin Mərkəzi Seçki qərargahının üzvü olub.
Vəliyəddin İsmayılov 1966-cı ildən dövrü mətbuatda çıxış edir. Yazıçı-publisistdir. Azərbaycan Jurnalistlər Birliyinin üzvüdür. “Qızıl qələm” mükafatı laureatıdır. “Hacı Zeynalabidin Tağıyev adına” və “Qarabağ Xeyriyyə Cəmiyyəti”nin mükafatlarına layiq görülüb. 250-dən çox məqalə və publisist yazıların müəllifidir. Otuzdan çox kitabda xatirə yazıları, hekayələri, xalqımızın qədim adət-ənənələri, faktlar və ədəbi mühit haqqında yazıları dərc olunmuşdur. Bir sıra qoşmaları və nəsihətamiz, yumoristik şeirləri var.
Xalq-hakimiyyət birliyini şərh edən “Xalqın səsi – Haqqın səsi” kitabının tərtibçisidir.
“Aydın səma” və “Yeni bəşər” qəzetlərinin, şair Bəhmən Vətənoğlunun həyat və yaradıcılığına həsr olunmuş “Bəlkə bir də bitdim, ək məni, dünya” və müqəddəs ocaqlardan olan Seyid Yusif Ağa ocağına həsr edilmiş “Nurdan yaranıb, nura dönən…” adlı xüsusi buraxılış jurnallarının təsisçisidir.
Üç ovladı, yeddi oğul nəvəsi var. Həyat yoldaşı İsmayılova Sona müəllimə, oğlu Vüqar müəllim, oğlu İlqar hüquqşünas, qızı Sevinc həkimdir.
Vəliyəddin İsmayılov otuz ildən çox rəhbər vəzifələrdə çalışıb və hazırda “Dövlət qulluqçusu” təqaüdçüsüdür. Kəlbəcər Ağsaqqallar Şurasının sədridir. Vətəninə, xalqına, qədim soy-kökünə bağlı adamdır. Çox mehriban, səmimi və təvazökardır.
10 fevral 2023-cü il tarixdə Vəliyəddin İsmayılovun 80 yaşı tamam olur. Zəngin həyat və idarəetmə təcrübəsinə malik, müdrik el ağsaqqalı Vəliyəddin İsmayılova möhkəm cansağlığı, bundan sonrakı fəaliyyətində uğurlar və 30 ildən çox həsrətində olduğu, doğulduğu Kəlbəcər rayonunda öz ailə üzvləri, əzizləri və el-obası ilə xoş günlər keçirməyi arzulayırıq.