Yeni Azərbaycan Partiyası Kəlbəcər Rayon təşkilatının və Yevlax şəhər M.Ə.Sabir adına 2 nömrəli tam orta məktəbinin birgə təşkilatçılıgı ilə 27 aprel 2023-çü il tarixində sözügedən təhsil ocağında Kəlbəcər rayonunun Şəhid Milli Qəhrəmanları polis mayoru Şahlar Şükürov və Sərdar Səfərova həsr olunmuş “Unudulmayan qəhrəmanlar” adlı anım tədbir keçirilib.
Kanal32.az-a verilən məlumata görə,tədbirdə Kəlbəcər rayon İcra Hakimiyyətinin başçısı Azər Qocayev, YAP Kəlbəcər rayon təşkilatının sədri Həbib Misirov, YAP Yevlax rayon təşkilatının sədri Rafiq Əliyev, Səfərbərlik və Hərbi Xidmətə Çağırış üzrə Dövlət Xidmətinin Kəlbəcər rayon şöbəsinin rəisi polkovnik-leytenant Nazim Çələbiyev, Səfərbərlik və Hərbi Xidmətə Çagırış üzrə Dövlət Xidmətinin Yevlax rayon şöbəsinin rəisi Samir Qurbanov, Yevlax rayon prokuroru Ceyhun Almasov, Dövlət Təhlükəsizlik Xidmətinin Yevlax Rayon Şöbəsinin rəisi İlqar Bagırov, Yevlax rayon Təhsil sektorunun müdiri Namidə Abbasova,Kəlbəcər RİH-in məsul əməkdaşları və media nümayəndələri iştirak edib.
Tədbirdə öncə Dövlət Himni səsləndirilib, Azərbaycan xalqının Ümummilli Lideri Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Daha sonra Milli Qəhrəmanlarımızın həyatından və onların doğulduğu Kəlbəcərdən bəhs edən videoçarxa baxılıb.Ardınca isə ibtidai sinif şagirdləri tərəfindən şəhidlərimizə həsr edilən ədəbi-bədii kompozisiyalar nümayiş olunub, vətənpərvərlik mahnıları səsləndirilib.
Tədbirdə Kəlbəcər rayon İcra Hakimiyyətinin başçısı Azər Qocayev, YAP Kəlbəcər rayon təşkilatının sədri Həbib Misirov, YAP Yevlax rayon təşkilatının sədri Rafiq Əliyev, Yevlax Rayon Prokuroru Ceyhun Almasov, Yevlax şəhər 2 nömrəli tam orta məktəbin direktoru Sədaqət Şükürova,EL televiziyasının aparıcı-redaktoru, Beynəlxalq Jurnalistlər Federasiyasının üzvü İnqilab Şirinli,Əməkdar müəllimi Leyla Səlimova çıxış edərək Milli qəhrəmanlarımızın həyatı, təhsil illəri və şərəfli döyüş yolu haqqında geniş məlumatlar veriblər. Milli qəhrəmanların tanıdılması məqsədilə təşkil edilən tədbirin təqdirəlayiq olduğu vurğulayıblar. Çıxışlarda Prezident, Müzəffər Ali Baş Komandan İlham Əliyevin rəhbərliyi altında rəşadətli Ordumuzun qazandığı Qələbədən söhbət açılıb, şəhid ailələrinə göstərilən yüksək diqqət və qayğıya görə ölkə rəhbərliyinə minnətdarlıq ifadə olunub.
Tədbirin sonunda Yevlax şəhər 2 nömrəli tam orta məktəbin bir neçə müəllimi Yeni Azərbaycan Partiyası Kəlbəcər rayon təşkilatının fəxri fərmanları ilə təltif edilib.