Allahşükür Paşazadənin istefası tələb edilir
Qafqaz Müsəlmanları İdarəsinin (QMİ) sədri Allahşükür Paşazadənin istefası tələb edilir.
Kanal32.az-ın xəbərinə görə, buna səbəb QMİ sədrinin “Xameneinin fətvası qələbəmizin carçısı idi” açıqlamasıdır.
Sosial şəbəkədə #Şeyxistefa həştəqi ilə paylaşımlar edilir.
A.Paşazadə son müsahibəsində səsləndirdiyi fikirlərə aydınlıq gətirərək deyib ki, “Təəssüf edirəm ki, çıxışımı yanlış, təhrif edilmiş formada cəmiyyətə təqdim ediblər. Mən hər şeydən əvvəl din xadimi kimi danışmalıyam. Din xadimi olmayan istənilən müsəlman belə bu cür ifadələrdən istifadə edir. Məni ittiham edənlər o çıxışıma tam baxsınlar. Mən raketdən danışmamışam, Allahdan, duadan danışmışam. Heç vaxt heç kimin qucağında olmamışam. Məni ittiham edənlər çalışır ki, ölkədə sünni-şiə qarşıdurması yaratsın. Bu, başqa maraqlardan doğur. Hər şeyin fərqindəyik. Mən din adamıyam, nə İranın, nə də Türkiyənin adamı deyiləm. Azərbaycanın vətəndaşıyam. Həyatım boyu dəfərlərlə mən bunu sübut etmişəm , ömrümü düzgün yaşamışam. Amma bəzi adamlar siyasi formada bundan istifadə etmək istəyirlər. İran da bizim qonşumuzdu. Türkiyə də eyni qaydada qonşumuzdur. Türkiyə bizim həm də yaxın qardaşımız dostumuz, həmişə bizim yanımızda olan dövlətdir. İran da bizə dost dövlətdir, bunu deyən mən deyiləm, bunu deyən dövlətimin başçısıdır. Orda 30 milyona yaxın bizim soydaşlarımız var, biz onlarla əlaqə saxlamalıyıq və onlarla münasibətimiz olmalıdır. İranın lap belə səhvi olsa belə onunla düşmənçilik etməməliyik. Elə adamlar var, onlar maraqlıdır ki, İranı Ermənistana tərəf itələyək. Bizim siyasətimizdə İranı özümüzə yaxın eləmək var. Onu yaxın etmək də o demək deyil ki, Azərbaycanı onların qucağına veririk. Siyasi baxımdan biz dost olmalıyıq, münasibətdə olmalıyıq”.
Şeyxin bu açıqlaması da qaneedici hesab olunmayıb. Çıxış yolu kimi yalnız istefası göstərilir.
Qeyd: O, bir neçə müddət əvvəl səlahiyyət müddəti ilə bağlı açıqlama vermişdi: “Mən nə qədər varam, Qafqaz Müsəlmanları İdarəsinin qurultayı keçirilməyəcək. Qurultayda ömürlük seçilmişəm. Nə qədər ki, həyatdayam, belə bir qurultayın keçirilməsi nəzərdə tutulmur”.
/pravda.az/