Şəhidimizin cənnətdəki ilk doğum günü-FOTOLAR
Martın 8-i Vətən müharibəsi şəhidi, Pərvin Azər oğlu Həmidovun doğum günüdür. Şəhidin 27-ci doğum günü onsuz, dünyaya göz açdığı Mingəçevirdə qeyd olunub.
Kanal32.az xəbər verir ki,Şəhidimizin cənnətdəki ilk doğum gününü ailə üzvüləri, 2 fidan körpəsi, dostları və döyüş yoldaşlarının iştirakı ilə keçirilib. Öncə döyüş yoldaşları Şəhidin həyat yoldaşı və övladları ilə görüşüblər. Pərvin Həmidovun komandiri Şahmar Cəlilov və döyüş yoldaşları onun qorxmazlığından, qəhrəmanlığından, sonsuz Vətən sevgisindən,dostları arasında qazandığı hörmətdən danışıblar. Onunla bağlı xatirələrini dilə gətirən döyüş dostları göz yaşlarına hakim ola bilməyiblər.
Sonra Pərvin Həmidovun adına hazırlanmış tortların simvolik olaraq kəsilməsi mərasimi baş tutub.Şəhidimizin cənnətdəki ilk doğum günü tortunu onun həyat yoldaşı Günay Həmidova və Şəhidin öz adını daşıyan körpə oğlu Pərvin kəsib.
Daha sonra mərasim iştirakçıları Şəhid qəhrəmanın Mingəçevir Şəhidlər xiyabanındakı məzarını ziyarət ediblər. Şəhidin məzarına gül dəstələri qoyulub, ruhuna dualar oxunub. Döyüş dostları onun güllərə qərq olmuş məzarı önündən əsgər marşı ilə keçərək ona hərbi salam veriblər.
Qeyd edək ki, hərbi avtomobil sürücüsü olan Pərvin Həmidov 44 günlük Vətən müharibəsində sözün əsl mənasında şərəflə döyüşüb. Cəbhənin Suqovuşan, Talış və Murov dağ istiqamətində gedən ağır döyüşlərdə qəhrəmanlığı ilə diqqət çəkib və düşmən texnikasının ələ keçirilməsində, düşmən səddinin yarılmasında xüsusi şücayət göstərib.
Suqovuşan istiqamətində gedən ağır döyüşlər onun idarə etdiyi “Ural” markalı hərbi maşın düşmən artileriyasının açdığı aramsız atəş nəticəsində vurulub və Pərvin yanındakı döyüş yoldaşları ilə birlikdə Şəhidlik zirvəsinə ucalıb.
Qeyd edək ki,27 yaşı martın 8-də tamam olan Pərvin Azər oğlu Həmidov Vətən muharibəsinin 5 -ci günündə – oktyabrın 2-də şəhadətə qovuşub. Döyüşlərdə göstərdiyi şücaətə görə ölümündən sonra Ali Baş komandan İlham Əliyevin sərəncamı ilə “Vətən uğurunda” və “Suqovuşanın azad olunmasına görə” medalları ilə təltif edilib.
Kanal32.az