İsmayıllı Şəhidlər Xiyabanının yenidənqurmadan sonra açılış mərasimi keçirilib-FOTOLAR
8 Noyabr-Zəfər Günü ilə əlaqədar Şəhidlər Xiyabanının yenidənqurmadan sonra açılış mərasimi keçirilib.
Kanal32.az-a verilən məlumata görə İsmayıllı Rayon İcra Hakimiyyətinin təşkilatçılığı ilə keçirilən açılış mərasimində Rayon İcra Hakimiyyətinin başçısı Nahid Bağırov, RİH-in əməkdaşları, hüquq-mühafizə orqanlarının rəhbərləri, şəhid ailələri, qazilər, idarə, müəssisə, təşkilat rəhbərləri və ictimaiyyət nümayəndələri iştirak edib. Mərasimdə memorial kompleksin önünə əklil qoyulub, Dövlət Himni səsləndirilib, Azərbaycan Respublikasının ərazi bütövlüyünün, müstəqilliyinin müdafiəsi zamanı şəhid olan Vətən övladlarının ruhu bir dəqiqəlik sükutla yad edilib.
Tədbiri giriş sözü ilə açan Rayon İcra Hakimiyyətinin başçısı Nahid Bağırov 2020-ci il sentyabrın 27-dən başlayan və işğal altındakı ərazilərimizin azad edilməsi ilə nəticələnən Vətən müharibəsi tariximizin ən parlaq səhifəsinə çevrildiyini qeyd edib. Bildirib ki, yenidənqurma işləri aparılmış Şəhidlər Xiyabanı hər bir vətəndaşın qürur və and yeridir. Qəhrəman hərbçilərimizin, şəhidlərimizin keçdiyi şərəfli həyat yolu gənc nəsillər üçün örnəkdir və onların təbliği hər zaman aparılmalıdır.
Çıxış edən şəhid ailələri övladlarının xatirəsinin daim əziz tutulmasına, həmçinin Şəhidlər xiyabanının əsaslı şəkildə yenidən qurulmasına görə dövlətimizin başçısı İlham Əliyevə şəhid ailələri adından minnətdarlıqlarını bildiriblər.
Sonra şəhid məzarları ziyarət edilib, önünə gül dəstələri qoyulub.
Allah bütün şəhidlərimizə rəhmət etsin!
Kanal32.az